BLOQUE POR ASTURIES ye un alcuerdu estratéxicu, un espaciu políticu compartíu que tien la voluntá de facer país dende la izquierda. Esti procesu d´unidá, quier xenerar un nuevu ámbitu políticu ilusionante y esperanzador pa entamar a reconstruyir l´espaciu de la izquierda asturianista y del asturianismu progresista. Quier ser un referente políticu pal asturianismu d´izquierdes.

BLOQUE POR ASTURIES y les persones que lu sofiten queremos que seya la ferramienta que mos permita construyir otra Asturies que ye posible y pernecesaria. Caltener un futuru dignu pal conxuntu de la ciudadanía d´esti país. Pola dignidá, la rexeneración y la identidá d´Asturies.

BLOQUE POR ASTURIES considera que ye indispensable algamar un alcuerdu ensin esclusiones ente toles fuercies polítiques y sociales interesaes na ellaboración d´un proyeutu empobináu a superar la fonda crisis xeneral que padez Asturies. Restitui-y al nuesu Pueblu la so lexítima autoestima y reintegra-y al conxuntu de los nuesos conciudadanos y conciudadanes la posibilidá d´escoyer llíbremente´l so futuru colectivu.

Asturies vien siendo duramente tratada nestos años, sofriendo un procesu de destruición de les sos bases económiques, la so identidá como Pueblu, la so llingua y cultura, el so mediu natural y les sos perspeutives de desarrollu. Les promeses incumplíes, la corrupción, el desmantelamientu económicu, la esclusión social, el paru, la precariedá llaboral y l´autoritarismu son dalgunes de les carauterístiques más infames de la rialidá política d´anguañu. Esti modelu que mos ufierten nun sirve a los intereses de les clases populares d´Asturies. Faen falta alternatives al mesmu dende plantegamientos de la izquierda, l´ecoloxismu, la xusticia social y la democracia participativa. Una alternativa que recuperando la ilusión pola izquierda, respuenda a los problemes y necesidaes de los asturianos y asturianes.

BLOQUE POR ASTURIES representa un proyeutu fechu dende y p´Asturies, fondamente democráticu, progresista, d´izquierdes, que tantos y tantes defenden ca día. Un proyeutu de llibertá, nuevu, de futuru. Un proyeutu que contraponemos a la triste rialidá que mos imponen. Un proyeutu d´esperanza, d´un futuru meyor, la fuercia pa facelo rialidá.

BLOQUE POR ASTURIES ye una propuesta novedosa y positiva, por y pa la ciudadanía. Una propuesta dende los movimientos sociales, onde tienen sitiu tolos mundios y nun se impón el mundiu de los más ricos y especuladores, que tán faciendo un país pa unos pocos y onde les mayoríes nun somos teníes en cuenta.

BLOQUE POR ASTURIES ye un proyeutu unitariu, alternativu y plural. Un proyeutu que pretende xunir alrodiu d´un programa común al conxuntu de les persones y organizaciones que lluchamos por un futuru meyor pal nuesu país. Un proyeutu onde nos vamos volver alcontrar munchos collacios y collacies.

BLOQUE POR ASTURIES ye una alternativa pa reconstruyir la izquierda n´Asturies y ponela a trabayar conxuntamente. Que nun ye poco.