NA PRÓSIMA REFORMA L´ESTATUTU OFICIALIDÁ

 Asturias vive nuna situación de billingüismo desequilibráu, na que los drechos llingüísticos de la parte de la población que fala asturianu nun tan llegalmente reconcíos y esa desigualad ta na raíz de la minorización social y la pérdida xeneracional que ta careciendo esta llingua.

Esta situación inxusta nun pue allargase más tiempo, y pa solucionala, la nuestra macación jurídica tien de garantizar la igualad de drechos civiles a tolos asturianos y asturianes, de manera que n´Asturies sea posible facer vida con total normalidá tanto n´asturiano como en castellán.

La llingua asturiana como elemento central de la cultura d´esti pueblu, ye un padremuñu común de tolos habitantes d´Asturies, cualquiera que sea la so fala materna y con la independencia de la ideología, creyencia o militancia que tengan; como tal elemento fundamental de la nuestra identidá común, l´asturianu precisa un nivel de defensa y de promoción mui superior al que tien agora.

En consecuencia, y por too ello, manifestamos la necesidá inexcusable de que la futura reforma del estatuto d´Autonomía d´Asturies incluya la declaración d´oficialidá de la llingua astuirana, como única herramienta llegal que se pue garantizar el respetu a los drechos civiles de tolos asturianos y asturianes y la sobrevivencia de la nuestra llingua, y qu´esti mesmu estatus ha tenelu tamién la fala eo-naviega.

Carta Fundacional del C.A.O.

EL XXVIII DÍA DE LES LLETRES ASTURIANES, ENTE LA CELLEBRACION Y LA REIVINDICACION

07/05/2007

El vienres pasáu celebróse n´Uviéu la Manifestación pola oficialidá de la llingua asturiana. La marcha reivindicatica salió a les siete la tarde de la Estación del Norte y cuntó cola presencia d´Izquierda Xunida-Bloque por Asturies-LV, PAS-URAS, Andecha Astur y la coalición Unidá, amás de dellos de los llíderes del Partíu Popular d´Asturies, como Ovidio Sánchez, que tuvo na Xunta Estraordinaria de l´Academia de la Llingua nel Campoamor.

A les puertes del Campoamor, Nacho González, encargáu del Serviciu de Normalización Llingüística de Cangas dio llectura al discursu oficial de la manifestación, que güei ufiertamos a los llectores d´ASTURNEWS.COM

Dempués de la Xunta Estraordinaria pública, que lleva alantre l´Academia de la Llingua Asturiana cada añu, la Institución celebró una espicha abierta a tolos ciudadanos en ´La Gruta´. La espicha, amenizada por dellos músicos del país, cuntó cola presencia de la nueva académica Marta Mori d´Arriba y personalidaes del mundiu de la cultura y la política asturianes.

ALVIERTE D`UN CONCLICTU ´DE CONSECUENCIES IMPREVISIBLES´ EN CASU DE NUN HABELA

El Bloque por Asturies afirma que nun va firmar reforma del estatutu ensin oficialidá

Redacción

20/01/2006 Rafael Palacios y Roberto Colunga, dirixentes de Bloque por Asturies, dieron esta mañana una rueda de prensa n`Uviéu p`afitar les posiciones de la so organización na reforma del Estatutu d`Autonomía. Afondando nes declaraciones que diere`l pasáu miércoles a Asturies.com, Rafael Palacios afirmó que la so organización nun va compartir nengún alcuerdu de gobiernu con fuerces polítiques que nun quieran reconocer la oficialidá nel estatutu d`autonomía y apeló ´a la responsabilidá de les fuerces polítiques asturianes pa nun convertir el reconocimientu d`un derechu humanu nun conflictu de consecuencies imprevisibles´.

El secretariu del Bloque por Asturies Roberto Colunga apautó`l marcu xeneral en que s`inxerta l`actual reforma del estatutu d`autonomía y afirmó que ´Dende Asturies y dende la izquierda, ye inasumible`l caltenimientu d`una situación de torga permanente del desarrollu de les nuestres instituciones polítiques d`autogobiernu, que se nos llenden competencies básiques o se nos niegue la nuestra identidá´. Colunga declaró que pal Bloque ye preciso retrucar al escosamientu del modelu actual d`autonomía d`Asturies y a la reforma estatutaria del 1998, que-y abulta que ´nació muerta´. Contra ello, el secretariu del Bloque diz que la so organización ve con enfotu les posibilidaes que s`abren cola reforma estatutaria, un procesu que camienta qu`ha dar con ´una dimensión territorial, económica y ambiental, col oxetivu de construyir modelos de desarrollu sostenibles qu`equilibren Asturies´ y qu`ha ´garantizar la participación y el protagonismu social, rexenerando`l sistema democráticu, reconociendo la realidá nacional, llingüística y cultural d`Asturies y el derechu a escoyer llibremente`l nuestru futuru colectivu como Pueblu´.

Lloñe del llinguaxe de les imposiciones, Colunga declaró que l`Estatutu asturianu ha salir ´del diálogu ente toles fuerces ensin escluyir nenguna parte de la sociedá´. Un diálogu que Rafael Palacios, dirixente tamién de BA, cree que forma parte del discursu históricu del asturianismu que dixo que ´foi quien a separtase del camín del conflictu pa buscar un camín de futuru consensuáu pa la nuestra llingua, sentándose a la mesa de negociación con tolos interlocutores´. Con too y con ello, Palacios alvirtió de que la reivindicación llingüística n`Asturies pue derivar ´nun conflictu de consecuencies imprevisibles´ conflictu que, de producise, nun se-y podría echar la culpa esclusivamente a les fuerces asturianistes, en cuantes que según Rafael Palacios son ´les úniques que s`esfuercen por llegar a alcuerdos´.

El tamién Director de Cooperación del Gobiernu asturianu afirmó que contra la voluntá de diálogu namás hai ´l`insultu permanentemente, la descalificación y les posiciones belixerantes pa col nuestru idioma y identidá´ polo que llamó a ´tar a l`altura de la situación´ a los elementos más contrarios a les reivindicaciones asturianistes, con atención especial al secretariu de la FSA - PSOE Javier Fernández, al que Palacios acusó de facer ´declaraciones cíniques y ofensives´ al afirmar que nun diba aceptar la oficialidá por ser esta una ´cláusula d`imposición´. Palacios negó-y la mayor al secretariu de la FSA y pidió-y qu`atendiere a les ´auténtiques cláusules d`imposición que carecemos los asturianos´ en referencia ´al portalgu del Güerna, l`exiliu económicu de la mocedá o la reconversión económica permanente´.

Afitándose otra vuelta na idea de que nin FSA nin PP tienen interés real en facer la reforma del Estatutu nesta llexislatura , Rafel Palacios declaró que, en cualquier casu, el Bloque nun diba participar ´en nengún gobiernu, coalición electoral o alcuerdu políticu permanente o coyuntural con nenguna fuerza política que votare a favor o sofite una Reforma Estatutaria que nun reconoza los derechos políticos, económicos, sociales, culturales y llingüísticos que-y correspuenden a Asturies, ente ellos la Oficialidá de la Llingua Asturiana y del Gallego-Asturiano nel so territoriu´.