Soi d´izquierdes y asturianista. Pa mín, el nacionalismu nun ye una ideoloxía, ye una estratexa y una ferramienta p´algamar el doble oxetivu del reconocimientu de los derechos nacionales que-y corresponden a Asturies y de la xusticia social pal nuestru Pueblu, siendo consciente qu´ello sofita la llucha d´otros Pueblos en cualquier llugar del planeta. Pa mín, ser d´izquierdes y asturianista significa solidaridá, internacionalismu, fraternidá, apertura, entendimientu y llucha contra los intereses privaos, la intransixencia, la intolerancia y la cerrazón mental. Ye lluchar pa que Asturies seya soberana pa decidir lo que más-y convenga, llíbremente, ensin imposiciones. La soberanía nun ye una gracia que nos conceda naide, sinon un derechu que nos corresponde como Pueblu.
Nun me interesa la soberanía a seques. Nun me val un Pueblu soberanu pero sometíu a la dictadura social, económica y militar del capital. Nun quiero reproducir los sos mesmos errores, los sos mesmos esquemes. Nun se trata de reproducir les sos miseries, los sos mecanismos d´explotación, la so basura, la so represión, los sos exércitos, el so sistema. Nun se trata d´eso.
La existencia d´un procesu de construcción nacional nun tien que ser una torga pa la llucha social, sinon que tien que beneficiala. Les reivindicaciones nacionales tienen que favorecer les lluches sociales. Trátase d´integrar nun todo la llucha pola construcción nacional y la llucha pola xusticia social. Trátase d´una apuesta firme pola unidá d´acción.
Tamos planteando la necesidá de dotar al nuestru Pueblu de soberanía política, lo que tamos pidiendo ye´l reconocimientu d´Asturies como Pueblu soberanu dentro del marcu del exerciciu de la soberanía popular. Tenemos que dir avanzando nel procesu d´apertura d´espacios d´exerciciu de soberanía y algamar el reconocimientu final de la soberanía global nel procesu de construcción nacional. Tenemos que conseguir en primer llugar la capacidá y el reconocimientu pa tomar decisiones soberanamente, facer actos de soberanía nel procesu de construcción nacional.
Tamos falando d´una nación política. Tamos falando de transcender el nacionalismu d´anguañu pa facer compartir la idea de construcción nacional a la mayoría d´esti país plural.
Pero tóo esto queremos facelo dende la izquierda, dende un modelu democráticu radical qu´integre les aspiraciones polítiques, culturales y económiques. Un proyectu social solidariu pa cambiar, dende l´asturianismu y dende l´internacionalismu, la rialidá d´Asturies y del mundu, planteando´l principiu de la fraternidá y la solidaridá ente los pueblos. Debe ser parte esencial del conceptu del nuevu orden económicu mundial. Partir del principiu de xusticia y solidaridá ente los pueblos.
Hai qu´articular una respuesta plural, amplia y contundente por parte de toles fuerces d´izquierda. Hai qu´ellaborar una respuesta política, una alternativa aglutinante de tolos sectores de la izquierda. Hai que llegar a un entendimientu de toles fuerces aparcando discrepancies y trabayando no que tenemos en común.
Necesitamos un referente d´acción unitariu en clave de cambiu social y políticu. Una iniciativa política, non ideolóxica, con vocación de ser una alternativa d´izquierda potente frente a la derecha y la socialdemocracia.
Tenemos la obligación de desarrollar l´espaciu de la izquierda, exprimilu, agrandalu cada vez más. Tenemos que ser capaces d´ofrecer un referente d´izquierda a la búsqueda de mayoríes.
N´Asturies hai estremaes sensibilidaes que s´espeyen n´estremaes organizaciones polítiques, pero estremaes sensibilidaes que nun nos puen torgar trabayar xuntos, ellaborar una política común pal nuestru país y ser capaces de construir una alternativa d´acción unitaria d´izquierdes.
Ye´l momentu de la unidá d´acción. Nun podemos siguir peleándonos en mediu d´una inundación.
Acabo con una frase del Subcomandante Marcos: ´Los rebeldes se buscan entre sí, se caminan unos hacia otros, se encuentran y rompen juntos los cercos´.