La Reforma del Estatutu d´Autonomía p´Asturies, ye una oportunidá única pa reconocer la capacidá del nuestru país p´autogobernase, dende una conciencia d´identidá colectiva comprometía colos valores de la solidaridá, la xusticia social, la llibertá, el respetu a los derechos humanos y la oficialidá de la llingua asturiana. Un Nuevu Estatutu d´Autonomía pa tóos y toes dende la izquierda. Un proyectu de país qu´Asturies necesita, llibre del absolutismu, la prepotencia, el despotismu, l´autoritarismu, el nepotismu, la concentración de poder en poques manes, el comederu, el clientelismu,...
Nun podemos seguir permitiendo que nos falten al respetu.
El PSOE y el PP resumen Asturies en dos coses: infraestructures que nun hai manera d´acabar y planes de la minería. Namás. Demientres otres Comunidaes falen de planes de futuru, nosotros siguimos abrazaos a les deudes del pasáu.
Asturies vivió a lo llargo de los últimos venti años un procesu de descentralización, restrixéndose la so capacidá política a un fechu básicamente alministrativu. La negación del reconocimientu de los mesmos drechos políticos, económicos, llingüísticos, institucionales o competenciales que les llamaes Nacionalidaes Hestóriques, enmárcase nuna concepción de les instituciones polítiques asturianes como una Diputación, sometíes al sucursalismu del Estáu y a l´ausencia d´una voluntá y un proyeutu políticu articuláu p´Asturies.
Dende Asturies y dende la izquierda, ye inasumible´l mantenimientu d´una situación de permanente frustración del desarrollu de les nuestres instituciones polítiques d´Autogobiernu, de la llimitación de competencies básiques del nuestru gobiernu o de la negación de la nuestra identidá como Pueblu. L´autogobiernu plenu d´Asturies ye una idea estratéxica de la izquierda asturiana, non sólo porque tou Pueblu tien derechu a constituyise como Comunidá Política, sinon tamién porque la vertebración d´Asturies, la superación del desmantelamientu económicu, les propuestes de tresformación dende la izquierda y la defensa de la so identidá necesiten un poder políticu democráticu que les articule.
Ye necesario responder al agotamientu d´un modelu autonómicu que supunxo la imposibilidá p´Asturies de constituyise política y institucionalmente, d´autogobernase y de desarrollase dende la so identidá llingüística y cultural.
Esti ye un procesu complexu, con una indispensable dimensión política, más autogobiernu y más democracia, ye dicir mayor capacidá pa decidir sobre la nuestra rialidá y más participación y protagonismu social. Pero tamién con dimensiones sociales y culturales, de recuperación y avance nos derechos sociales y el compromisu colos elementos básicos de la nuestra identidá, llingua y cultura. Un procesu con una dimensión territorial, económica y ambiental, col oxetivu de construyir modelos de desarrollu sostenibles qu´equilibren el conxuntu d´Asturies y los sos Conceyos.
Ye imprescindible un Nuevu Estatutu d´Autonomía p´Asturies que desarrolle al másimu les posibilidaes d´autogobiernu y reconoza´l llexítimu derechu a escoyer llíbremente´l nuestru futuru colectivu como Pueblu, torgando que´l futuru d´Asturies seya decidíu n´otres instancies que nun seyan les que llibre y democráticamente decidiéramos.
Un Nuevu Estatutu d´Autonomía p´Asturies que se vertebraría alrodiu de cuatro exes fundamentales:
1. Capacidá política plena d´Asturies.
2. Reconocimientu de la nuestra identidá colectiva y la oficialidá de la llingua asturiana.
3. Ampliación de les Competencies esclusives, de desarrollu llexislativu y d´execución, reforzando la entidá política ya institucional d´Asturies.
4. Reforma fondera del sistema de financiación.